تحضير حلويات تقليدية

 طريقة غريبية الكاوكاو تذوب ذوبان

المقادير

كيلة مرغرين ذايبة و باردة 

كيلة غير ربع سكر ناعم 

رشة ملح 

بات آروم نوازات (تمد ذوق هايل)

كيلة كاوكاو مڨلي و مرحي

الفرينة حسب الحاجة (حوالي 2 كيلات) 

التزيين

ورق الذهب

شوكولاطة الطلاء 

طريقة التحضير

أول خطوة نذوب المارغرين من الأحسن لابال خدمت بأنواع أخرى ما خرجتليش نفس النتيجة، ذوبيها و حطيها ف فريجيدار تعاود تجمد من بعد حطي سكين و لا مغرف و سيحي الماء لي يقعد لتحت 

* نحط الفرينة في بلاطو و ندخلها للفور تتحمر مليح من تحت و من فوق من بعد نخليها تبرد و نغربلها 

من بعد فال وعاء نحط المرغرين و نضيف عليه السكر الناعم مغربل + رشة الملح و نخدمهم مليح بالباتور المدة تتراوح من بين 10 حتى 15 دقيقة حسب درجة حرارة المطبخ 

كي يطلعو مليح نضيف لابات آروم انا درت نوازات لأنو زينتها ب شوكولاطة الطلاء و اذا زينتوها ب توفيا ولا طوفيا ديرو لابات آروم تع الكراميل من بعد حبسو من الخلط، و اذا حبيتوها غير بالكاوكاو بدون أذواق ديرو لافاني 

من بعد ضيفو الكيلة تع الكاوكاو كيما قتلكم مڨلي و مرحي و من بعد ضيفو الفرينة بالتدريج حتى تتحصلو على خليط كيما راه واضح فالصورة من بعد مباشرة فرشو كيس بلاستيكي و حطو العجين تاعكم و اطبعو بالطابع لي تفضلوه 

فرشو ورق الطهي في بلاطو و حطو حبات لغريبية تاعكم و دخلوها للفرن مدة لا تتعدى الخمس دقائق خرجوها من الفور رايحة تبانلكم طرية و مش طايبة لكن انتوما ما توشيوهاش خلاص حتى تبرد تماما من بعد زينوها كيما موضوحة في الصور 

ملاحضات مهمة :

1/ المرغرين بعد ما تعاود تجمد و تصفيوها خليوها ترجع بدرجة حرارة المطبخ  

2/ الفرينة لازم تكون باردة تماما 

3/ رشة الملح ضرورية (رشة خفيفة فقط)

4/ السكر و الفرينة ضروري تغربلوهم مرتين

5/ ما تشيحوهاش بزاف باه ما تجيكمش يابسة 

6/ الفرن سخنوه من قبل ربع ساعة على 180°

7/ نأكد و نعاود ما تخلوهاش في الفور اكثر من 5دقايق باه ما تجيكمش يابسة