- 2 كيلو سمك فيليه
- 3 كوب أرز بسمتي
- ملعقة صغيرة كركم
- 3 فص ثوم مفروم
- 3 بصلة مفرومة
- 2 ثمرة طماطم مقطّعة مكعبات
- ملعقة كبيرة زنجبيل طازة مفروم
- قرن فلفل حامي مفروم
- ملعقة صغيرة بهارات
- علبة صلصة طماطم
- ملعقة صغيرة كاري
- ملعقة كبيرة كمون
- ملح وفلفل أسود
- 1/ 2 كوب زيت
- 3 كوب ميه
اغسلي السمك الفيليه، وقطّعيه لشرائح بالطول، واغسلي الأرز، وانقعيه في الميه لمدة نصف ساعة.
تبّلي السمك بالملح والفلفل والكمون والبهارات والكاري والكركم، وسيبيه لمدة ساعة علشان يتشرّب من التتبيلة.
بعد ما السمك يتّبل، حمّريه في زيت ساخن، وبعد ما السمك يستوي شيليه من الزيت.
في نفس الزيت اللي حمّرتي فيه السمك، شوّحي البصل لغاية ما يبقى لونه دهبي، وبعد كده ضيفي عليه الزنجبيل والثوم وقلّبيهم مع بعض كويس.
ضيفي قطع الطماطم والصلصة على البصل، وقلّبي الخليط كله مع بعضه، وتبّليه بالبهارات والملح والفلفل، وبعد ما الخليط يغلي، حطي السمك فيه مرة تانية، وقلّبيه وضيفي معاه حبات الليمون الجاف والميه، وسيبيه لغاية ما السمك يكمّل سواه، وبعد كده ارفعي السمك من الخليط.
ضيفي الأرز على الصلصة، وقلّبيه كويس، وسيبيه يستوي على نار هادية، وبعد ما الأرز يستوي اغرفيه في طبق التقديم وحطّي السمك على الأرز من فوق، وممكن تزيّني الطبق بشرايح الليمون وأوراق النعناع.
